Basanda Ns Oswald
Uwizeye Vivine umwe mu baturage wo mu Murenge wa Gatenga mu Mujyi wa Kigali wamenyekanye ku mbuga nkoranyambaga, n’ibitangazamakuru bitandukanye ko yanduye Coronavirus COVID-19.
Byagiye bivugwa ko yanduje n’abandi icyo cyorezo, binavugwa kandi ko ashobora kuba yarapfuye, kuko yajyanywe kwa muganga yarembye cyane.
Kuri ubu, Uwizeye yarasezerewe mu kigo kivura abanduye Coronavirus cya Kanyinya mu Mujyi wa Kigali, akaba ari mu rugo iwe, yarakize icyorezo cya COVID-19, bapimye basanga bamwe mu bagize umuryango hari abanduye 5, barimo abana be 2 n’abandi bana batari abe 2.
Uwizeye ni umwe mu batangabuhamya bw’uburyo yavuwe agakira iki cyorezo cya Coronavirus COVID-19, ahamya ko u Rwanda rwiteguye neza mu guhangana n’iki cyorezo, kitagira umuti n’urukingo.
Uwo mugore apima ibilo 220, ni we murwayi wa Coronavirus, kugeza ubu wongerewe umwuka, kugira ngo ataremba cyane, kuko yageze kwa muganga atabasha guhumeka neza.
Yagize ati ‘‘uko iminsi ishira niko numvaga inkorora idasanzwe, ngakorora cyane, inkorora ntigeze ngira mu buzima bwanjye kuva menye ubwenge’’.
Dr Nsanzimana Sabin Umuyobozi Mukuru w’Ikigo cy’Igihugu Gishinzwe Ubuzima (rbc), avuga ko imibare igaragaza ko abarimo gusanganwamwo Coronavirus, ari mu bashoferi bambukiranya imipaka n’abo bahuye nabo.
Ubu abarimo gusangwamo ubwandu ni abarimo gufatirwa ku mupaka, bagashyirwa mu kato, bagapimwa.
Yagize ati ‘‘Turebye imibare y’uburyo abantu banduye mu minsi 10 ishize, bigaragara ko ubwandu bwinshi, burimo guturuka hanze, hakiyongeraho abantu bake bandura, kuko bahuye n’abo binjiye mu gihugu’’.
Ku wa 14 Gicurasi 2020, imibare mu Rwanda, igaragaza ko abamaze kwandura bari 287, naho abamaze kuyikira ni 164, nta n’umwe yari yahitana kugeze ubu nta n’urembye.
Minisiteri y’Ubuzima ikomeje gushishikariza abaturage gukurikiza amabwiriza yo kwirinda icyo cyorezo, harimo gukaraba intoki kenshi, gusiga intera ya metero 1.5, no kwambara agapfukamunwa ahantu hahurira abantu benshi..
Imibare ya Minisiteri y’Ubuzima, igaragaza ko mu bantu 286 bamaze kwandura Coronavirus mu Rwanda, abantu 191 bayikuye hanze, 95 banduzwa n’abo bahuye nabo bayifite.
Mu minsi icumi ishize habonetse abarwayi 43. Muri abo, abaturutse mu mahanga ni abantu 32, banduza abantu 11.
Ku isi, imibare yabamaze kwandura coronavirus COVID-19, ku wa 14 Gicurasi 2020, yerekana ko abamaze kuyandura ari 4, 466, 625, abamaze kwitaba Imana ni 299, 483, mu gihe abamaze kuyikira ari 1, 678, 382, naho abo imaze guhitana mu masaha 24 ashize uyu munsi ari 1, 718.
