Basanda Ns Oswald
U Rwanda, imibare y’abamaze kwandura yavuye ku abantu 84, ubu bakaba bageze ku abantu 89 ni ukuvuga ko hiyongereye abantu 5 mu gihe cy’umunsi 1, nkuko tubikesha Minisiteri y’Ubuzima, nta muntu n’umwe wari wahitanwa n’icyo cyorezo cya coronavirus.
Ministeri y’Ubuzima, ivuga ko abo bagaragaweho icyo cyorezo, bakomeje kwitabwaho no gukurikiranwa n’abaganga ahantu habugenewe, kandi ko nta muntu muri bo urembye, ahubwo ko bamwe muri bo bashobora gutangira gutaha mu ingo zabo, kuko nta bindi bimenyetso byatuma badasubira mu ingo zabo.
Uburyo butandukanye bwashyizweho mu rwego rwo kwirinda COVID-19 harimo n’udupfukamunwa
Muri Leta Zunze Ubumwe z’Amerika (USA) abamaze kwandura ni 277, 522 abamaze kwitaba Imana ni 7, 403, ni mu gihe abanduye bushya ari 361, naho abamaze kwitaba Imana mu gihe cya vuba ari 11. Mu Butaliyani, abamaze kwandura ni 119, 827, naho abamaze guhitanwa na yo ni 14, 681. Muri Espagne abamaze kwandura Coronavirus ni 124, 736, ni mu gihe abamaze guhitanwa na yo ari 11, 744 abamaze guhitanwa na yo vuba aha ni 546.
Mu Budage, abanduye ni 91, 159, naho abamaze kwitaba Imana ni 1, 275, mu Bufaransa abamaze kwandura COVID-19 ni 82, 165 naho abo imaze guhitana ni 6, 507, Ubushinwa abanduye ni 81, 639, naho abamaze guhitanwa na yo ni 3, 326, abamaze guhitanwa na yo vuba aha ni 4.
Israel abamaze kwandura ni 7, 589 naho abo imaze guhitana ni 42, naho abanduye vuba ni 161, abamaze guhitanwa na yo vuba aha ni 2. Australia abamaze kwandura 5, 550, abo imaze guhitana ni 30, abanduye vuba aha ni 96, abitabye Imana vuba aha ni 2.
Kongo Kinshasa abanduye COVID-19 ni 148 naho abamaze guhitanwa na yo ni 16, Uganda abamaze kwandura COVID-19 ni 48, nta we irahitana. Tanzania abamaze kwandura ni 20 ni mu gihe 1 ari we umaze guhitanwa na yo. Mu Burundi hamaze kwandura abantu 3 nta we yari yahitana. Kenya abanduye ni 122 mu gihe abo imaze guhitana ari 4.
Minisiteri y’Ubuzima mu Rwanda isaba abanyarwanda n’abaturarwanda kuguma mu rugo, no kwirinda gukomeza kuzerera nta mpamvu, kandi bagahora bakaraba intoki mu rwego rwo kwirinda COVID-19, mu gihe hagize ugaragaraho ibimenyetso agahamagara 114, cyangwa se mu gihe umuntu ashatse kwisuzuma agakanda *114# cyangwa akandika kuri email callcenter@rbc.gov.rw, cyangwa se akandika kuri watsap 0788 20 20 80.
Abanyarwanda bakaba bakomeje gusabwa kubahiriza metero 1 hagati y’umuntu n’undi, mu rwego rwo kwirinda ikwirakwizwa ry’icyo cyorezo cya Coronavirus COVID-19, kuko ni bwo buryo bwonyine bwo kuyirwanya no kuyikumira ngo idakomeza gukwirakwira hirya no hino bityo abantu bazayisohokemo amahoro nta n’umwe ihitanwa mu gihugu cyacu.
