Amakuru

RDC: Abatutsi bakomeje kwicwa muri Kongo Kinshasa

Kuri twitter y’Amahoro Peace Association bati ‘‘Twamaganye iyicwa rya Bwana Semutobo (umucuruzi w’Umunyamulenge) i Kalima (Maniema); wahohotewe n’abaturage bitabira imvugo y’urwango,  ihamagarira ubwicanyi bo mu bwoko bw’Abatutsi muri DRC’’, yishwe azira icyo ari cyo’’.

Abavuga ururimi rw’ikinyarwanda bakomeje kwibasirwa n’abaturanyi babo babanye imyaka n’imyakura, babaziza uko bavutse ni uko basa, ibyo birabera mu ntara zitandukanye zigize igihugu cya RDC.

Mu rwego rwo kurwanya ubutumwa bw’inzangano bukwirakwizwa ku mbuga nkoranyambaga, abayobozi bo mu mijyi bateguye akanama gashinzwe umutekano ku wa 21 Kamena 2022 bagamije gusobanura ingamba no kumenya abakoze ayo mahano kugira ngo bashyikirizwe ubutabera hifashishijwe amategeko.

Muri iyo nama yagutse iyobowe n’umuyobozi w’Umujyi wa Uvira, abayobozi basobanuye uko umutekano uriho ubu mu mujyi wa Uvira ndetse no mu burasirazuba bwa DRC muri rusange.

Ikwirakwizwa ry’ubutumwa bw’inzangano byagaragaye ko ari akaga gashobora guhungabanya umutekano mu mujyi wa Uvira.

Kiza Muhato, Umuyobozi w’umujyi ntabwo yahishe ko ubutumwa bukwirakwizwa ku mbuga nkoranyambaga batesha agaciro  Umunyamulenge no kwibasira Abanyamulenge.

Inkomoko yacu ivuga ko ubwo bukangurambaga bugomba kurangirira muri Uvira ni uko abaturage bose bagomba guhurira hamwe bakamagana abakwirakwiza ubwo butumwa bw’inzangano.

Abitabiriye iyo nama yaguye y’umutekano bemeje ko hashyirwaho komisiyo ishinzwe kurwanya ubwo butumwa bw’inzangano. Inshingano z’iyo komisiyo ni ukumenya abanditse ubwo butumwa bw’inzangano kugira ngo batange raporo mu byiciro.

Abakozi ba serivisi z’umutekano bitabiriye iyo nama bagaragaje ko abayobozi b’amatsinda y’imbuga nkoranyambaga bagomba kuba aba mbere kwamagana abanditsi b’ubutumwa bw’inzangano bitabaye ibyo bakazafatwa nk’ibyitso kandi serivisi z’umutekano zishobora kubakurikirana.

Icyo cyemezo kibereye muri Uvira mu Intara y’Amajyepfo nyuma y’ubutumwa bw’inzangano ku mbuga nkoranyambaga aho abakoze icyaha bategura igikorwa cyo kurwanya abatutsi. Abo banditsi baragaragaje mu majwi yabo azenguruka ku mbuga nkoranyambaga ko Abanyamulenge bagomba kwicwa kandi ko imitungo yabo igomba gusahurwa ku wa 26 Kamena 2022.

Ibyo byakurikiranye n’ibikorwa by’urugomo byakorewe Abanyamulenge n’abandi batutsi mu mujyi wa Goma nyuma y’intambara itangiye hagati ya M23 na FARDC kandi hashize iminsi mike ifatwa ry’Umujyi kuva i Bunagana na M23.

Hari Abatutsi bamaze kuhasiga ubuzima

Ku wa 19 Kamena mu gitondo, umwe mu bacuruzi witwa Semutobo yiciwe muri Komini yo mu cyaro ya Kalima, agace ka Pangi mu Ntara ya Maniema.Nk’uko byatangajwe n’umuyobozi w’iyo komini, Philémon Kikobia Fataki, ngo icyo gikorwa cyakozwe n’abaturage nyuma y’urugendo rwateguwe n’Ishyaka riri ku butegetsi UDPS / Kalima cyo gushyigikira FARDC.

Philémon Kikobia Fataki ahamagarira abaturage gutuza no kwirinda ibikorwa by’inzangano, amakimbirane yo mu gihugu no gukemura amanota, imyitwarire inyuranye no kubana.Umuyobozi w’Akarere avuga ko icyo kibazo cyahagaritse ibikorwa byose byo muri uwo mujyi.

Guverineri w’Agateganyo w’Intara ya Maniema Afani Idrissa Mangala, mu kiganiro n’abanyamakuru cyasohoye kuri iki cyumweru, ahamagarira abaturage gutuza.

Insorensore i Kinshasa zirahiga bukware Abatutsi

Abatutsi bakomeje guhigwa bukware n’insoresore zo mu Mujyi wa Kinshasa, urwo rubyiruko rwiganje mu Ishyaka rya UDPS riri ku butegetsi, bamaze iminsi bagaragara ku mbuga nkoranyambaga bambaye imyenda y’igisirikare, bitwaje imihoro bavuga ko bari guhiga abavuga Ikinyarwanda muri icyo gihugu.

Inzego z’umutekano zatangiye guhagurukira abahiga ubwoko Tutsi, abafashwe barimo uwitwa Jules Kalubi Mbuyamba wafatwaga nk’umuyobozi w’urwo rubyiruko i Kinshasa, aho bamaze iminsi bazenguruka imihanda itandukanye y’i Kinshasa bahiga uvuga Ikinyarwanda ngo bamuhitane, nyuma y’imirwano yahuje igisirikare cyabo FARDC n’umutwe wa M23.

Umuyobozi wa Polisi i Kinshasa, Sylvano Kasongo, yatangaje ko abo basore bagiye gushyikirizwa ubutabera kubera imvugo n’ibikorwa by’urwango rushingiye ku moko rushobora guteza umutekano muke mu gihugu.

Amashusho yashyizwe ku mbuga nkoranyambaga agaragaza abo basore bafashwe bicajwe hasi, bambaye amapingu.

Jules Kalubi Mbuyamba uri mu bafashwe yavuze ko yarenganyijwe kuko ibyo yakoraga byose byari mu nyungu z’ishyaka riri ku butegetsi ndetse no gushakisha amafaranga yo gufasha ingabo ziri ku rugamba.

Loni iherutse kwamagana ubwicanyi bukorerwa Abatutsi muri Kongo Kinshasa, Leta ya Kongo  ikomeje kuruca ikarumira kuri urwo rwango rukomeje gututumba, rushobora kuvamo ubugizi bwa nabi nka Jenoside

Muri Kongo Kinshasa hahise haduka imyigaragambyo n’imvugo zibasiye abavuga Ikinyarwanda muri icyo gihugu, aho bamwe bakomeje kwicwa abandi bakagirirwa nabi bazira kugirana isano n’u Rwanda.

 Ubwanditsi millecollinesinfos.com

 

Click to comment

Leave a Reply

Your email address will not be published. Required fields are marked *

To Top