Abaturage bo mu Karere ka Musanze barahamya ko gutsinda urugamba rwa Covid-19 byatewe no kuzuzanya hagati y’abaturage n’ubuyobozi, kuko ngo basenyeye umugozi umwe mu guhashya icyo cyorezo cyari gifite ubukana budasanzwe aho bamwe bahasize ubuzima, abandi bajyanywa kwa muganga bitabwaho bituma bakira icyo cyorezo.
Mbarubukeye Saverina, umuturage wo mu Mudugudu wa Nyarubande Akagari ka Rwambogo, Umurenge Musanze, Akarere ka Musanze, yabwiye itangazamakuru ko yakize Covid-19 bitewe n’ uko yumvaga ahinda umuriro, akorora, agana ikigo nderabuzima cya Musanze, baramupima basanga arwaye Covid-19.
Yagize ati ‘‘bampaye imiti, barambwira ngo nzagaruke, ndangije imiti barambwira ngo indwara yashize, bampa n’igipapuro nzerekana mu Mudugudu ko nakize na n’ubu ndacyakibitse’’.
Ahamya ko kuyirwara bitatewe n’uko atari aherutse gukora ingendo, ko byamutunguye ari iwe mu rugo.
Mukagatagara Gaudance, na we utuye mu Murenge wa Musanze, yavuze ko igihe cya Covid-19 batari bagifite icyizere cyo kubaho, yagize ati ‘‘Abaganga babidufashijemo, inshinge baraziduteye, uru ni urugamba igihugu cyatsinze’’.
Abaturage bavuga ko gutsinda Covid-19 byatewe n’impamvu zitandukanye, zirimo kwiteza inshinge incuro nyinshi, harimo urukingo rwa 1,2, 3 ndetse n’urukingo rwa 4 rushimbangira cyane ku bantu bakuze.
Gilbert Nduwayezu, Umuyobozi w’Ikigo Nderabuzima cya Musanze, yavuze ko muri uwo murenge wa Musanze abamaze gukingirwa Covid-19 ari abaturage ibihumbi 62 270, aho abafashe dose ya 1 bangana n’ibihumbi 38738, doze ya 2 bangana n’ibihumbi 20131, doze ya 3 ni abaturage ibihumbi 2 868, naho abafashe doze ya 4 bangana n’igihumbi 1033.
Kamanzi Axel, Umuyobozi wungirije w’Akarere ka Musanze, yasabye abaturage kimwe na ba Mukerarugendo bagana ako karere, gukomeza gukaza ingamba zo kwirinda icyorezo cya Covid-19, kuko ingamba zashyizweho bakomeza kuzubahiriza.
Yagize ati ‘‘ni ngombwa gukoresha ikoranabuhanga mu gihe cyo kwishyura, mu gihe ugize icyo wishyura mu isoko’’.
Abanyamakuru bibumbiye muri ABASIRWA batambagizwa mu Bitaro bya Ruhengeri, uburyo bitaga ku barwayi ba Covid-19.
Umuyobozi wungirije w’Akarere ka Musanze yavuze ko n’ubwo hafashwe ingamba zo gukumira icyorezo cya Covid-19, habonetse abarwayi 2 bayifite kandi ko bari gukurikiranwa n’abaganga, avuga ko nta mpungenge bimuteye kuba yavuga ko hari abagaragaweho n’icyo cyorezo cya Covid-19.
Kamanzi yavuze ko n’ubwo Covid-19 yari igihari, ko ako Karere gashingiye ku bukerarugendo bitabuza ko bakagana, kuko ingamba zikomeye zafashwe harimo gukaraba intoki kenshi, kwambara agapfukamunwa mu gihe cyo gusura ingangi mu Birunga ati ‘‘nta mpungenge biduteye’’ mu gihe habonetse abarwayi 2 bafite Covid-19.
Umuyobozi wungirije w’Akarere ka Musanze ahamya ko Covid-19 yagiye igaragara ahantu hatandukanye no mu mirenge yitaruye nk’Umurenge wa Gashaki na Shingiro idafite aho ihuriye n’amasoko ndetse n’urujya n’uruza rw’abantu benshi, ko igihe cya Covid-19 naho yahagaragaye.
Abanyamakuru bibumbiye bibumbiye mu muryango wa ABASIRWA wageze mu Murenge wa Gashaki usanga aho abana bakingirwa inkingo bafite imyaka hagati 5 na 11 bikingiza, aho umuyobozi w’ikigo cya Gashaki mu Kagari ka Mbwe hamaze kwikingiza abana 60 muri doze ya kabiri naho abamaze kwikingiza doze ya mbere ni 315, nkuko byemejwe na Barimwinshi Leonard ushinzwe kwinjiza imibare muri mudasobwa.
Mu Murenge wa Musanze, umuyobozi w’Ikigo Nderabuzima cya Musanze ahamya we abaturage bamaze gukingirwa ari 62 270, aho abamaze guhabwa doze ya mbere ari 20131, doze ya kabiri ni 2868 naho doze ya kanne ni 1033 na bo bahamya ko kuri ubu bagenda bakingira umunsi ku wundi mu bigo by’amashuri.
Umuyobozi wungirije w’Akarere ka Musanze avuga ko ingamba zo gukomeza kwirinda icyorezo cya Covid-19 ko batazatezuka mu kuyihashya harimo na ba mukerarugendo basura ingangi mu Birunga ndetse n’ubukerarugendo bushingiye ku nama muri uwo mujyi.
Mu Karere ka Musanze hitabye Imana abaturage 64 bahitanywe n’icyorezo cya Covid-19, ni mu gihe hari harashyizweho ahantu 136 ho kwita ku bantu bayigaragaweho muri ako karere.
Abana bamaze guhabwa urukingo rwa 1 bangana na 68421 naho abamaze guhabwa urukingo rwa 2 ni 47 690.
Abaturage b’ Akarere ka Musanze bangana 438 482, ingo zituye ni 107191, ubuso butuwe ni 530,4km2, ni mu gihe ubucucike bungana n’abantu 766/km2.
Basanda Ns Oswald
